Fosfolipid anticisimlər
Antikardiolipin antitellərinin pozitiv olması, anti fosfolipid sindromu ehtimalını təsdiqləyən bir kriteriya olaraq qəbul edilir. IgG sinfi olan anti kardiolipin antitellərinin tromboza meyilliliyi digər siniflərə nisbətən daha çox olduğu məlumdur. Kollagen toxuma xəstəlikləri ilə əlaqəli olan antitellər daha çox IgG sinfindəndir. Yalnız IgM sinfi antitellərinin mövcudluğu halında pozitivliyin infeksiya törədicisi ilə əlaqəli və keçici olma ehtimalı daha yüksəkdir.
Antifosfolipid sindrom diaqnozunun kriteriyalarına görə, tək bir dəfə aparılan analiz nəticəsinə istinad edilməməli, ən azından 6 həftə sonra yoxlama yenidən təkrarlanmalıdır.
Sifilis başda olmaqla, bəzi infeksion xəstəliklərdə antifosfolipid antiteli testlərində yalançı pozitiv nəticə olma ehtimalı nəzərdə saxlanmalıdır.
Antifosfolipid sindrom (AFS)
AFS immun sistemi tərəfindən orqanizmin öz hüceyrələrində (plazmatik membranda) yerləşən fosfolipid molekullarına qarşı anticisim sintez etməsi nəticəsində yaranan autoimmun patologiyadır. Bu sindrom zamanı qanın damar daxilində laxtalanması sürətlənir və müxtəlif kalibrli damarlarda (arteriya və venalarda) tromblar yaranır. Normada anticisimlər infeksion mənşəli antigenlərə qarşı sintez olunur. Bu patologiya zamanı isə əsasən endotelial hüceyrələrin, trombositlərin, trofoblast hüceyrələrin membranasındakı lipid-zülal kompleksinə qarşı sintez olunur və autoanticisimlər adlanır. Nəticədə pasientdə trombozla əlaqədar ağciyər emboliyası, böyrək çatışmazlığı, infarkt, insult kimi ağırlaşmalar, trombositopeniya, hamilə qadınlarda isə preeklampsiya və təkrari düşük kimi fəsadlar yaranır. AFS zamanı plazmada antikardiolipin anticisimləri (IgG/IgM), lupus antikoqluyantı və anti β-2-qlikoprotein-I anticisimləri (IgG/IgM) aşkarlanır. Normada qanda bu anticisimlər ya aşkarlanmır, ya da çox cüzi miqdarda mövcud olur.
AFS hər kəsdə yarana bilər. Lakin reproduktiv yaşdakı (uşaq dünyaya gətirə bilmə yaşı) qadınlarda bu sindroma daha çox rast gəlinir. Hamiləlik, hərəkətsizlik, piylənmə, cərrahi müdaxilə, hiperxolesterolemiya (qanda xolesterin miqdarının yüksək olması), oral kontraseptivlərin qəbulu bu sindromun yaranma ehtimalını artırır.
Pasientə AFS diaqnozu qoymaq üçün ən azı 1 (bir) klinik və 1 (bir) laborator kriteriya olmalıdır. Klinik kriteriya vaskulyar trombozlar (hər hansı orqan və toxumada arterial yaxud venoz tromboz) və hamiləlik patologiyası (təkrari düşüklər, dölün naməlum səbəbdən ölümü, ciddi preeklampsiya) hesab olunur. Laborator kriteriya isə anti β-2-qlikoprotein-I anticisimləri, antikardiolipin anticisimləri və ya lupus antikoaqulyantı hesab olunur. Bu anticisimlərin ən tez 12 həftə ara ilə iki dəfə müsbət olması AFS üçün təsdiqləyici nəticə olur və aralarında anti β-2-qlikoprotein-I anticisimləri AFS üçün daha spesifik və informativdir. Çünki kardiolipin anticisimləri və lupus antikoaqulyantı infeksion xəstəliklər, qırmızı qurd eşənəyi zamanı da aşkarlana bilər.