Mikoplazmoz
Mikoplazma pnevmoniyaları (bəzən “atipik pnevmoniyalar” adlanır) cəmiyyətdən qaynaqlanan pnevmoniyaların bütün hallarının 15-20%-ni təşkil edir. İnfeksiya mənbəyi həm xəstələr, həm də daşıyıcılardır. İnfeksiya hava damcı yolu ilə baş verir, inkubasiya dövrü 2-3 həftə davam edir. Mikoplazma infeksiyasının simptomları müxtəlifdir. Əksər hallarda xəstəlik yüngül keçir və bir neçə həftə davam edən öskürək, burun axması, boğaz ağrısı ilə müşayiət olunur. İnfeksiya aşağı tənəffüs yollarına keçdikdə baş ağrıları, intoksikasiya, qızdırma, əzələ ağrıları baş verir. Pnevmoniyanı ən çox uşaqlar, eləcə də immuniteti zəif olan insanlar ağır keçirir.
"Mikoplazma infeksiyası" diaqnozunun təyini çox vaxt çətindir, buna görə də seroloji testlərin aparıcı rol oynadığı bir neçə tədqiqat metodu istifadə olunur.
Mycoplasma pneumoniae infeksiyasına cavab olaraq immun sistemi spesifik immunoqlobulinlər sintez edir: IgA, IgM və IgG.
Mycoplasma pneumoniae üçün G sinif immunoqlobulinlərinin sintezi yoluxmadan təxminən 2-4 həftə sonra əmələ gəlir və uzun müddət (bir il və ya daha çox) davam edir.
Qanda Mycoplasma pneumoniae-ya qarşı G sinif immunoqlobulinlərinin olması kəskin və ya keçirilmiş xəstəliyi, xroniki iltihab prosesini və ya təkrar infeksiyanı göstərir. Atipik pnevmoniya klinikası olan xəstələrdə, Mycoplasma pneumania infeksiyası ehtimalının dəyərləndirilməsi məqsədi ilə istifadə olunur.
Tədqiqat nə üçün istifadə olunur?
Mycoplasma pneumoniyaya səbəb olduğu cari xəstəliyi (yenidən infeksiya daxil olmaqla) təsdiqləmək üçün;
Mikoplazmal pnevmoniya və tənəffüs yollarının digər yoluxucu xəstəliklərinin, məsələn, streptokokların və ya stafilokokların səbəb olduğu pnevmoniyaların differensial diaqnozu üçün;
Tənəffüs yollarının xroniki iltihabi xəstəliklərində mikoplazma infeksiyasının diaqnozu üçün.
Tədqiqat nə vaxt təyin olunur?
Mikoplazmanın səbəb olduğu xəstəliyin əlamətləri ilə (bir neçə həftə davam edə bilən öskürək, qızdırma, boğaz ağrısı, baş ağrıları və əzələ ağrısı);
Tez-tez residivlərlə özünü göstərən Mycoplasma pneumoniae infeksiyasının xroniki və ya davamlı formasından şübhələnirsinizsə.
Mənfi nəticənin səbəbləri:
İnfeksiya yoxdur;
immun reaksiyasının inkişaf etmədiyi infeksiyanın çox erkən dövrü.
Müsbət nəticənin səbəbləri:
cari və ya keçmiş mikoplazma infeksiyası;
xroniki mikoplazma infeksiyası;
Mycoplasma pneumoniae ilə təkrar infeksiya (IgM mənfi olduqda).
Nəticəyə nə təsir edə bilər?
Təhlilin nəticələrinə immun sisteminin pozğunluqları, autoimmun xəstəliklər, HİV təsir edə bilər;
Digər növ mikoplazmaların, ureaplazmanın səbəb olduğu yoluxucu xəstəliklər yalançı müsbət nəticəyə səbəb ola bilər.
Vacib Qeydlər
Mycoplasma pneumoniae ilə infeksiyanın diaqnozu mütləq hərtərəfli olmalıdır - epidemioloji tarixdən, klinik mənzərədən və digər testlərdən alınan məlumatları dəyərləndirərək. M və G sinif immunoqlobulinlərinin təyini mütləqdir.
Mikoplazmaya qarşı immunitet qeyri-sabitdir, təkrar infeksiya mümkündür.